Hainbat lagun batu dira protestara, eskubide sozialen aldeko plataformak deituta. Eragileek salatu dute iruzurra jasan dutela eta banketxeak zein udalak "babesgabe" utzi dituztela.
[Youtube]http://youtu.be/_D0iMYpGXj0[/Youtube]
Kaleratzeon atzean iruzurra dagoela salatu dute Bilboko hainbat gizarte eragilek. SOS Arrazakeriako kide Brijida Ridruejok azaldu du hiru enpresak antolatu dutela, "baina jabe berberak dituzte". Mena kaleko 1 eta 3 zenbakietako eraikinak lortu zituzten enpresok: "Migratzaileei alokatu dizkiete guztiak, kalteberak direlako, ez dituztelako ezagutzen hemengo legeak eta hizkuntzekin zailtasunak dituztelako".
Hiru familietako bat gaur goizera arte izan dute enpresek engainatuta: uste zuten ez zituztela kaleratuko, eta epaitegiko langileen aginduak ustekabean harrapatu ditu. Arropa eta etxeko gauzak unean jaso behar izan dituzte. Bilboko Udalak etxebizitza sozial bat eskaini die gaur bertan: asteartetik aurrera emateko konpromisoa hartu dute udal langileek, eta ordura arte pentsio batean emango diote ostatu sendiari. Beste bi familiek beste alokairu bana lortu dute; Ridruejok nabarmendu du "eragileen eta auzotarren elkartasunari esker" ordaindu ahal izan dituztela kontratuetako diru ezarpenak.
