Azken orduetan Ertzaintzak hiru gizon atxilotu ditu Bilbon, euren bikotekidea edo bikotekide ohia jotzea leporatuta. 30 eta 39 urte bitartean dituzte atxilotuek. Horietatik lehena atzo goizaldean atxilotu zuten Deustuko San Pedro plazan. Gizon batek bere emaztea jo zuen salaketaren arabera; ertzainek atxilotu egin zuten eta emakumea, odoletan, ospitalera eraman zuten.
Bigarren atxiloketa Bolueta auzoan burutu zuten, 30 urteko gizonezko batek bere bikotekide ohia ustez jo ostean. Salaketaren arabera, emakumeak sexu harremanak izateari uko egin ondoren jo zuen gizonak emakumea. Emakumeak ihes egin eta Ertzaintza ohartarazi zuen. Emakume hori ere ospitalera eraman zuten.
Hirugarren atxilotua bart atxilotu dute. Kasu horretan ospitaletik jaso du deia Ertzaintzak, eta ustez bikotekideak jo zuen emakume bat artatzen ari zirela ohartarazi zuten. Emakumeak ondoren salatu zuenez, behin baino gehiagotan jotzen zuen senarrak. Ertzaintzek etxera joan eta 31 urteko gizonezkoa atxilotu zuten.
