Azken orduetan hiru gizonezko atxilotu ditu Ertzaintzak Bizkaian, euren bikotekideei eraso egitea leporatuta. Biktimetako bi osasun etxeetan artatu behar izan dituzte.
Sopuertan gizonezko bat atzeman du bart, 22:30 aldera. Ertzaintzak dei bat jaso zuen esanez gizonezko batek emakume bat jo zuela kalean. Polizia bertaratu zen, eta emakumeak aitortu zion bikotekideak lepotik heldu eta muturreko bi eman zizkiola. Osasun etxera eraman zuten emakumea kolpeen ondorioz.
Gauerdian, Balmasedan beste gizonezko bat atzeman dute bikotekideari eraso egiten saiatzea egotzita. Dirudienez, biktimaren anaiak eragotzi du erasoa. Arratsaldean jada etxebizitza horretan izanak ziren ertzainak, bikotearen arteko eztabaida bortitzen arira.
Azkenik, goizaldean, 04:00 inguruan, Alonsotegiko emakume baten deia jaso du Ertzaintzak, babesa eskatuz. Ustez bikotekideak egin dio eraso. Etxea hankaz gora topatu du Poliziak, eta biktimak zauriak zituen ezpainetan eta sudurrean. Osasun etxera eraman dute.
