Barakaldoko etxe batean hiru gorpu aurkitu zituen atzo Ertzaintzak, indarkeria zantzuekin. Familia berekoak ziren hirurak, 80 urte inguruko gurasoak eta 51ko semea. Azken hura udaltzaina zen, eta Ertzaintzak azaldu duenez, litekeena da hark gurasoak hil izana lehenik, ondoren bere buruaz beste egiteko. Hilketak, laneko armarekin egin zituela uste du Ertzaintzak.
Arratsaldean eman zuen abisua familiaren ezagun batek. Inork erantzuten ez zuela ikusita, indarrez sartu ziren familiaren etxera, eta han aurkitu zituzten hiru gorpuak.
Barakaldoko alkateak, Alfonso Garciak, ulertezintzat eta tamalgarritzat jo du gertakaria.
