Igande goizean gertatu zen lehen erasoa, 7:40ean. 22 urteko gazte batek hozka egin zion bikotekideari aurpegian, eta Udaltzaingoak atxilo hartu zuen, genero indarkeria delitu bat leporatuta.
Ordubete geroago izan zen bigarrena. Ordu horretan, herritar batek Ertzaintzari dei egin zion, ohartaraziz bikote bat eztabaidan ari zela Urbina kalean eta gizonezkoak emakumea jo zuela.
Ertzainak bertara joan, eta ia konorterik gabe topatu zuten emakumea. Ezpainetatik odola zerion. Haren bikotekideak aitortu zuen emakumea jo izana, eta beraz, atxilo hartu zuten. Txagorritxuko erietxera eraman zuten emakumea.
Bestalde, Udaltzaingoak 44 urteko gizonezko bat atzeman zuen atzo 20:30 aldera Paula Montal kalean. Etxean zeudela, senar-emazteak eztabaidan ari zirela, gizonak emakumea jo zuen. Udaltzainak bertara joanda, andrea topatu zuten kalean, kolpeak jaso izanaren arrastoekin. Etxean zegoen gizonezkoa, labana bat eskuan zuela. Atxilo eraman zuten poliziek.
