Ertzaintzak hiru lagun atxilotu ditu azken orduetan, genero indarkeriari lotutako delituak egitea egotzita. Atzo arratsaldean atzeman zuten 19 urteko gazte bat, Sopelan (Bizkaia), bikotekide ohia era jarraituan jotzea leporatuta. Atxilo hartu zuten unean, atxiloketa saihesten saiatu zen haren lagun bat, eta hura ere atxiki zuten.
Bestetik, atzo iluntzean 34 urteko gizonezko bat atzeman zuen Ertzaintzak Getxon, etxebizitzan bikotekideari eraso egitea egotzita, Eusko Jaurlaritzako Segurtasun Sailak jakinarazi duenez.
Irunen atzeman zuten beste gizonezko bat, 39 urtekoa, atzo iluntzean. 22:40 aldera, gasolindegi batera joateko abisua eman zioten Ertzaintzari, emakume batek aurpegian zauri bat zuela eta. Ebaki bat zuen kokotsean, eta odol asko zerion. Emakumeak salatu zuen bikotekideak jo eta laban batekin zauritu zuela, eta gizona atxilo hartu zuten ertzainek. Biak artatu zituzten Bidasoko erietxean.
