Frankismoko krimenekin lotura izan zutelakoan hogei lagun galdekatu nahi ditu Maria Servini Argentinako epaileak. Zerrenda horretan pertsona oso ezagunak daude, frankismoko buruzagi politikoak, eta Polizian garai hartan aginte postu altuak zituztenak; ezagunenen artean, Rodolfo Martin Villa ministro ohia.
Akusatuak atxilotu ez dituztela-eta, kexa agertu diote biktimen elkarteek Eloy Velasco Espainiako Auzitegi Nazionaleko epaileari. Horien ustez, Espainiako Barne Ministerioak "utzikeria larriz" jokatu eta legeria urratu du Servini epaileak akusatutakoak ez atxilotzeagatik.
Horren aurrean, Velascok fiskalari informazioa eskatu dio, akusatuen atxiloketa eta estradizioaren inguruan, eta auzipetuekiko duen jarreraz ere galdetu dio.
Iazko azaroan, Argentinako Interpolek eskatu zuen "berehala" atxilotzeko Servini epaileak galdekatu nahi dituenak, horiek Argentinara estraditatzeko. Espainiako Barne Ministerioak fiskalaren esku utzi zuen auzia, argudiatuz Argentinako eskaerak ez zeudela behar bezala eginda. Elkarteek hori ere kritikatu dute, argudiatuz fiskalak ez duela eskumenik atxiloketen inguruan.
