Eusko Jaurlaritzaren hirukoak (EAJ, EA eta EB) PSE-EErekin orain dela aste batzuk 2008ko aurrekontuez lortutako aurre-akordioari esker, Eusko Legebiltzarrak gaur atzera bota ditu EHAK-k eta PPk bakoitzak bere aldetik jarritako osoko zuzenketak, gehiengoa osatzen dutelako.
Hala, hurrengo urteko kontuei buruzko prozesuak aurrera segitzen du, eta baliteke hilaren 28an onartzea aurrekontuak. Idoia Zenarrutzabeitia Jaurlaritzaren lehendakariordeak atea zabalik utzi dio Aralarrekin akordioak lortzeari.
Ia 10.000 milioi euro jasotzen dituzte aurrekontuek. Hirukoak PSE-EErekin egindako hitzarmenaren ondoren, 40,1 milioitan hazi zituzten 2008rako.
Leopoldo Barreda PPren legebiltzarkideak esan du "obsesio abertzaleen eta independentistei" erantzuten dietela, "inoiz baino gehiago, gainera", eta PSE-EE kritikatu du, batez ere.
Itziar Basterrika EHAKren parlamentarioaren ustez, aurrekontuak ez daude "nazio eraikuntzara" bideratuak, "eta Espainiarekiko menpekotasuna indartzen dute". Sozialistekin lortutako akordioagatik, EAJk, EAk eta EBk marko juridiko-politikoaren aldaketari "eragozpena" jarri diotela esan du Basterrikak. AHT egiteko dirua jarri izana ere kritikatu du; "diru publikoa esku pribatuetan ipiniko dute".
Politika
Hirukoak eta PSEk baztertu egin dituzte EHAK eta PPk Jaurlaritzaren aurrekontuez jarritako osoko zuzenketak
Baliteke Eusko Legebiltzarrak hilaren 28an onartzea 2008ko aurrekontuak.
Iruzkinak
Ez dago iruzkinik
Ordenatu
