Ivan Jakovcic europarlamentariak aurkeztu du adierazpena, eta talde ugaritako ordezkariak daude sinatzaileak; tartean, Josu Juaristi EH Bildukoa.
Sinatzaileek gogorarazi dute Europako Batasunean 60 hizkuntza gutxitu daudela eta horiek 40 milioi hiztun dituztela. Horietatik 49 daude arriskuan, eta ia guztiek dituzte zailtasunak bizirauteko, europarlamentariek nabarmendu dutenez. Horiek babestea giza eskubideak betetzeko beharrari lotuta dagoela ohartarazi dute.
Hortaz, hizkuntza horiei "babes gehigarria" emateko eskatu diote Europako Batzordeari, eta tokiko agintariei, berriz, areagotu dezatela hizkuntza gutxituekiko kezka. Halaber, sinatzaileen arabera, Europako Batzordeak Europako Batasuneko estatu kideei eskatu beharko lieke hauteskunde kanpainetan hizkuntza gutxituak erabil ditzatela.
