Hogei urte baino gehiago Nafarroan aborturik gabe

Antsoainen klinika pribatua zabaldu arte, hogei urte luze joan ziren Nafarroan aborturik egin gabe. Haurdunaldia eten nahi zuten emakume guztiek herrialdetik kanpora joan behar zuten. 1986. eta 1987. urteetan hamar abortu egin zituzten Nafarroako Bideko Ama Birjina ospitale publikoan, orduko legeak ezarritako baldintzetan. Abortu horiek egiteagatik, hala ere, hiru mediku auzitara eraman zituzten. Espetxe zigorra eskatu zuten haientzat. Epaiketak oihartzun handia izan zuen Nafarroan. Geroztik, iaz Antsoaingo klinika zabaldu arte, ez da abortu gehiagorik egin. Gobernuak medikuen kontzientzia eragozpenerako eskubidea aipatu izan du beti aborturik ez egiteko aitzakia gisa.