Hondakinen planaren garapena txalotu dute

Gipuzkoa Zero Zabor plataformak «oso positiboa» iritzi dio hondakinak kudeatzeko Gipuzkoako Foru Aldundiak aurkeztutako planari. Elkartearen ustez, txostenak bat egiten du zero zabor filosofiarekin, eta garrantzitsutzat jo du agiriak hondakinen murrizketan, birziklapenean eta errefusaren ikerketan eragin nahi izatea. «Plana oso ona da ingurumen, ekonomia eta gizarte ikuspegitik», ziurtatu du plataformako kide Joxe Mari Irazustak.

Agerraldi bat egin zuen atzo goizean Gipuzkoa Zero Zaborrek, diputazioak aurkeztutako hondakinen kudeaketarako estrategiaren balorazio bat egin eta igandean Donostiako Saguesen egingo duten mosaikoaren egitaraua aurkezteko. Haizea Agirre plataformako kideak esan zuenez, hondakinen kudeaketa «ez toxiko» baten alde egin du aldundiak, eta gogorarazi zuen Europako Parlamentuak debekatu egin duela 2020rako material birziklagarriak erraustea.

Goiz osorako egitaraua

Testuinguru horretan antolatu dute igande honetan, ekainak 17, Donostiako Saguesen mosaikoa osatzeko aldarrikapen festa, Agirrek adierazi zuenez. 10:30ean hasiko da ekitaldia, musika eta eskulanekin. 11:00etan, Pirritx, Porrotx eta Marimotots pailazoak arituko dira Saguesen. 11:30 alderako, bertso saio bat prestatu dute. Eguerdian hasiko dira mosaikoan kokatzen, 12:30erako osatuta egon dadin.

Ika-mika politikoak alde batera uzteko eta plan berriaren edukien gainean eztabaidatzeko eskatu die plataformak alderdi politikoei.