Iñaki Arakama presoaren koinatak eta bere lagunek istripua izan dute bisitara bidean

Etxeratek jakinarazi duenez, "sakabanaketa politikak urteko laugarren istripu larriaeragin du". "Euskal Herritik 1.132 kilometrora duten Iñaki Arakama euskal preso politikoaren koinata eta hari laguntzera joandako bi lagunek izan dute istripua" Etxeratek jakinarazi duenez, goizeko 10:00ak aldera Segoviako (Espainia) probintzian. Istripuaren ondorioz, autoan zihoazen hiru lagunek kolpe eta ubeldura ugari dituztela jakinarazi du Etxeratek, eta haietako bik larrialdietara jo behar izan dutela.

Arakamaren senide eta lagunek Puerto I espetxeraino (Cadiz) astero irteten den senideen autobusa erabili ohi dutela dio Etxeratek, baina, asteburu honetan, "espetxeak aurrez aurrekoa igandean jarri zien, larunbatean lekurik ez zegoela argudiatuta". Beraz, autoz abiatu dira bisitara, presoaren koinata —honek egingo zuen bisita—, eta beste bi bidelagun.

Etxeratek azaldu duenez, "bat batean autoa eskuin aldera egiten hasi zaie eta atzealdearekinertza babesten duen hesia jo dute. Kolpearen ondorioz, autoa ezker aldera atera da eta mendiaren kontra jo dute". Euskal Herrirako buelta taxiz egin dute.

Etxeratek, beste behin salatu du "sakabanaketak eragindako istripu hauetako bakoitza ez dela kasualitatearen ondorio, euskal preso politikoek euskal herriarekin, euskal gizartearekin duten lotura apurtu nahian, fisikoki zein politikoki suntsitu nahian diseinatutako politika ankerraren ondorio baizik".