Juan Jose Ibarretxe Eusko Jaurlaritzako lehendakari ohiak "besarkada publikoa" eman nahi izan dio Carles Puigdemont Kataluniako presidente kargugabetuari, Vilaweb agerkarira bidali duen eskutitzan. Besarkada hori Puigdemontekin batera erbestean direnei ere bidali die Ibarretxek, baita "espetxe espainiarretan preso politikoen kolektiboaren parte direnei" ere. "Bai, preso politikoak", zehaztu du.
Ibarretxeren esanetan, Kataluniako independentismoak egin duen "pekatua" ez da izan herrialdearen "independentzia nahi izatea, Kataluniarentzat demokrazia nahi izatea baizik".
Ibarretxek Puigdemonten eta prozesu subiranista bultzatu dutenen "ausardia" eta "eskuzabaltasuna" goraipatu ditu. "Eskuzabaltasuna da zure herrian pentsatzea eta jendearen etorkizunean pentsatzea, edozein nahi pertsonal edo ondasunen gainetik. Carles estimatua, ez zarete handiak erbestea edo kartzela pairatzen duzuelako, handiak zarete zuen herrialdeko jendeak maite zaituztelako".
Ibarretxek Kataluniako presidente kargugabetuari adierazi dio ez duela "heroi" modura ikusten, baina bai hitzeko pertsona zuzen eta koherente modura. "Horregatik, presidente, betiko izango duzu nire aitortza eta nire maitasuna", gaineratu du.
Eskutitza osorik irakurri daitekeVilaweb agerkariaren webgunean.
