Igande goizaldean sexu eraso bat egin ziotela salatu zuen emakume batek Getxoko Algorta auzoan (Bizkaia). Ertzaintzak 19 urteko gizonezko bat atxilotu zuen astelehenean, erasoaren egilea delakoan, eta hura espetxeratzeko agindu du Getxoko Epaitegiak, Eusko Jaurlaritzako Segurtasun Sailak jakinarazi duenez.
Udaleko talde guztiek erasoa gaitzetsi dute adierazpen batean, eta eguerdian elkarretaratzea egin dute udaletxearen atarian. Imanol Landa Getxoko alkateak azpimarratu du emakumeek "lasai eta segurtasunez ibiltzeko oinarrizko eskubidea" izan behar dutela. Arratsaldean, dozenaka herritar batu dira Algortako Telletxe plazan, mugimendu feministak deituta.
