Palestianko Al-Ma'sara herrian brigadista lanetan ari zen Igor Goikolea gasteiztarrak atxilo jarraitzen du. Askapenak berri eman duenez, harekin batera atxilo zegoen brigadista italiarra libre utzi dute, baina Goikolea Al-Ma'saratik gertu dagoen aireportu bateko polizia etxera eraman dute. Ziurrenik bihar emango dute hura handik kanporatzeko agindua.
Askapenako kide Alaitz Amundarainek BERRIAri jakinarazi dionez, Goikolea egoera onean dago. "Hala esan digute abokatuek". Lehen aldia da hara joaten dena. Atzo atxilotu zuten, manifestazio batean parte hartzen ari zela. Astelehenean elkarretaratzea egingo dute Gasteizen, Elkartasuna ez da delitua! Igor askatu! Palestina aurrera! lelopean. 20:00etan izango da, Andre Mari Zuriaren plazan.
