Giro abertzale eta euskaltzaleko taberna bati eraso egin diote Tafallan (Nafarroa), gaur goizaldean. Ustez, ezezagun batzuek Pasadizo tabernari su eman diote, 04:30 aldera, eta suteak kalte larriak eragin ditu lokalean. Bizilagun batek abisu eman dio udaltzaingoari, eta suhiltzaileek sutea itzaltzea lortu dute, sua eraikineko etxebizitzetara hedatu aurretik.
Tabernak herritar euskaltzale eta abertzaleak bildu ohi ditu. Bihar, esaterako, Errigoraren aldeko kontzertu bat egitekoak ziren, eta duela zenbait egun Elkartasun Eguna ospatu zuten euskal presoen eskubideen alde.
Sutea nortzuk eragin duten argi ez badago ere, tabernan ohikoak diren hainbat lagunek eskuin muturrarekin lotu dute erasoa. Adierazgarria iruditzen zaie tabernak Hispanitate Egunaren bezperan su hartu izana. Foruzaingoak hartu du kasua, eta ikertzen ari da nahita piztu ote duen sua norbaitek.
Erasoa salatzeko elkarretaratzera egin dute iluntzean, 19:30ean, Elkartasuna Pasadizorekin. Erasorik ez lelopean.
