EH Bildu koalizioak gogorarazi du proposamen bat egin zuela ikurrinaren aldeko omenaldia egiteko, eta EAJk zuzenketa bat aurkeztu ziola. Koalizioaren ustetan, zuzenketa horrekin omenaldiak "balioa galtzen zuen"; horregatik, bertan behera uztea erabaki zuten. EH Bilduren asmoa ekitaldi "ireki eta barneratzaile bat" egitea zen, eta, aldi berean, "instituzionala eta herrikoia" izango zena.
EAJk, berriz, bihar egingo du ekitaldia. EH Bilduren ustez, saio horretan jeltzaleek ez dute asmorik ikurrina "guztion sinbolo gisa" aurkezteko, baizik eta "eurena bakarrik" izango balitz bezala. Horregatik, "bi aldiz" pentsatzeko deia egin dio, eta ez dezala "zatiketarako" elementu gisa erabil.
Bilbon elkartu dira koalizioko kideak, Arriaga plazako ikurrinaren aurrean. Ekitaldian adierazi duenez, ikurrinak "batasunerako arrazoia" izan behar du, "elkarbizitzaren sinbolo", eta inork ez du bere egin behar. "Mundu osoan euskaldunak batzen eta identifikatzen dituen sinboloa da".
