Alderdiek azken aukera dute gaur hautesleak konbentzitzeko, norberarena saltzeko edo arerioa hondoratzen saiatzeko. Gaur amaituko da hauteskunde kanpaina; bihar hausnarketa eguna izango da, eta etzi hauteskundeak.
EAJ izango da garaile igandean, inkesta guztien arabera. Bilbon egingo du kanpainako azken ekitaldia alderdi jeltzaleak, 20:00etan, Areatzan. Han egongo dira, Iñigo Urkullu lehendakarigaiarekin batera, Andoni Ortuzar EBBko burua, Joseba Egibar Gipuzkoako zerrendaburua eta Josu Erkoreka Bizkaiko zerrendaburua. Goizean Donostian egin dute ekitaldia.
EH Bilduk kanpaina hasiera egin zuen Areatzan, eta amaiera Donostian egingo du gaur, 20:00etan, Urdaneta kalean. Arnaldo Otegi lehendakarigaia, Maddalen Iriarte Gipuzkoako zerrendaburua, Jasone Agirre Bizkaikoa eta Miren Larrion Arabakoa bertan izango dira. Goizean Eusko Legebiltzarrean egin dute ekitaldia, eta Joseba Asiron Iruñeko alkateak parte hartu du bertan.
EH Bilduk bideo bat publiko egin du, joan zen larunbatean Miribillan egin zuen ekitaldiko irudiekin.
[youtube]https://youtu.be/5QOGQLr8qPA[/youtube]
Elkarrekin Podemosek Zarautzen egingo du kanpaina ixteko ekitaldia. Pili Zabala lehendakarigaiak alboan izango du Nagua Alba Ahal Dugu-ko idazkari nagusia. Pablo Iglesias Podemoseko idazkari nagusia goizean Donostian izan da, Zinemaldian, Política, manual de instrucciones filma ikusten. Gainera, Nafarroako Podemoseko kideak Kanpezun izango dira, Zabalarekin egingo duten ekitaldian.
PSE-EE Gasteizen izango da 20:00etan. Idoia Mendia lehendakarigaiak eta Natalia Rojo eta Susana Corcuera zerrendaburuek parte hartuko dute. PSE-EEk ere kaleratu du gaur bideo bat, berriz ere Elkarrekin Podemosi kontra eginez. Elkarrekin Podemos EH Bilduren gauza bera dela esaten du.
[youtube]https://youtu.be/W6Pz9TjKfRM[/youtube]
PPk ere kaleratu du gaur bideoa. Hobetzeko hamabi gauzaren zerrendan azkena: bakeari eta elkarbizitzari buruzkoa. "Inork ez dezan gure historia berridatz", dio. EAJ, EH Bildu eta Elkarrekin Podemosen kontra egiten du, besteak beste, presoak Euskal Herriratzea eskatzen dutelako.
[youtube]https://youtu.be/CfpL3FJWeq0[/youtube]
PPk ez du ekitaldirik egingo arratsaldean. Eguerdian eman dute amaitutzat kanpaina, 13:30ean Gasteizen egin duten ekitaldiarekin. Mariano Rajoy bertan izan da.
