197/2006 epaiari jarraituta Espainiako Justiziak Ines del Rio Prada euskal presoari luzatutako zigorra bidegabetzat jo zuen Giza Eskubideen Europako Auzitegiak iragan uztailaren 10ean, eta orain ebazpen hori berrikusi beharko dute auzitegiko areto nagusia osatzen duten hamazazpi epaileek. Atzo erabaki zuten bost epailek kasua berrikustea.
Uztaileko epaian, auzitegiak Del Rio aske uzteko eskatu zuen Europak, eta 30.000 euroko kalte-ordaina emateko. Erabaki horren aurka helegitea jarri zuen Espainiako Gobernuak hilaren 4an.
Espainiak urratutako artikuluak
Europako Giza Eskubideen Hitzarmeneko 7. artikuluan oinarrituta, defentsak argudiatu zuen ezin dela zigorrik ezarri hori bermatzen ez duen legerik ez bada, eta salatu zuen Espainiako Auzitegi Gorenaren epaiak atzeraeraginezkoak izatea. Del Riok kartzelan segitzea 5. artikuluaren aurkakoa dela zioen defentsak: "Askatasunerako eta segurtasunerako eskubidea jasotzen du artikulu horrek". Europak bi artikulu horiek urratu izana egotzi dio Espainiari.
14. artikulua ere aipatu zuen defentsak, diskriminazioaren debekuaz diharduena. Defentsaren esanetan, 197/2006 doktrinaren aplikazioak helburu politikoak ditu.
