Espainiako Auzitegi Gorenak, 101 herriko taberna konfiskatzeko erabakiarekin batera, hogei lagun zigortu zituen. "ETAren fronte insituzionala" osatzea egotzi zien horietako zortziri: Joseba Permach, Rufi Etxeberria, Juan Kruz Aldasoro, Joseba Alvarez, Karmelo Landa, Jon Gorrotxategi, Floren Aoiz eta Antton Morcillori. Kartzela zigorraz gain, "kargu publikoetarako inhabilitazio berezia" ezarri zieten; urtebete eta hamar hilabetekoa lehenengo bostei, eta urte eta erdikoa gainerakoei.
Inhabilitazio zigorra zein kargutara zabalduko den zehazteko eskatu zioten Gorenari AVTk eta Dignidad y Justiciak, eta hori zehaztu dute gaur ateratako autoan: "Izaera politikokoak izango dira, hiritarrek hautatuak, maila lokalean, autonomikoa, estatuan eta nazioz gaindikoan".
