Dena ez da festa Bilboko Aste Nagusian. Txomin Barullo konpartsak Iñigo Cabacas zena omendu eta oroitzeko ekitaldia egin du. Ekitaldian izan dira beste konpartsetako kideak, Cabacas zenaren gurasoak eta haren gertuko lagunak. Senideei babesa erakustea zen konpartsaren helburua, eta horregatik egin zieten hara biltzeko deia Athleticen zaleei eta Bilboko herritarrei.
Cabacas 2012ko apirilaren 9an hil zen, Bilbon, lau egun lehenago ertzain batek gomazko pilota batekin burua jo ostean. San Mames estadiotik gertu izan zen erasoa, Athleticek Europako partida bat jokatu ondotik. Athleticen zalea zen Cabacas. Joan den uztailaren 15ean Giza Eskubideak Urratzearen inguruko udal erretratuak txostenean sartu zuten haren izena, Bilboko eta Basauriko biktimen zerrendetan. Eusko Jaurlaritzak "moralki babesa" eman nahi izan zion haren sendiari, "mina arintzeko".
