Guardia Zibilak goizeko hamaiketan itxi du gaur goizaldean hasi duen polizia operazioa, eta inkomunikatuta eraman ditu bi atxilotuak. Jon Lizarribar eta Ruben Gelbentzu haien etxeak miatu ondoren eraman dituzte. Urnietan, Lizarribarren etxe atarian, hainbat lagun zeuden bilduta eraman dutenean, eta atxilotua askatzeko oihu artean eraman dute.
Ertzaintza ere bertara joana zen Guardia Zibila laguntzera, eta liskarrak izan dira atxilotuari babesa ematera joan direnean eta ertzainen artean.
Lau atentatutan parte hartzea leporatuta
Goizaldeko hiruretan hasi da polizia operazioa. ETAko komando bateko kide izatea leporatzen diete bi atxilotuei, eta Guardia Zibilak dio 2002an lau atentatutan parte hartu zutela: Iruñean Nafarroako Unibertsitatearen kontrakoa, Arguedasen eta Azagran enpresa banaren kontra eta Zaragozan El Corte Ingles saltokiaren kontra.
Haien etxeak miatu dituzte, eta, Euskadi Irratiak jakinarazi duenez, zenbait kaxa atera dituzte Lizarribarren etxetik. Han izan dira atxilotua bera, haren bikotekidea eta umea, 11:00 arte. Bost patrol eta furgoneta izan dira kanpoaldean. Andoainen ere Gelbentzuren etxea miatu dute guardia zibiliek, eta hainbat patrol izan dira inguruetan.
"Dokumentazio berria"
Biak ere atxilotu izan dituzte aurretik, bat 2003an eta bestea 2004an. Gelbentzu 2003an atxilotu zuten, beste hamabi lagunekin batera, baina horietatik lau soilik espetxeratu zituzten; Gelbentzu aske geratu zen. Lizarribarrek sei urteko espetxe zigorra bete zuen Frantzian, eta orain dela gutxi atera zen espetxetik.
Guardia Zibilak dio Frantzian azkenaldian aurkitu duten dokumentazioan oinarrituta uste dutela 2002ko atentatuetan parte hartu zutela. Carlos Urkijo Espainiako Gobernuaren ordezkariak esan du atxiloketa horiek frogatzen dutela Zuzenbide Estatuak funtzionatzen duela.
