Europako Banku Zentralak interes tasak puntu laurden bat igo ditu, %1,5era arte. Hala ere, Jean-Claude Trichet EBZko presidenteak uste du interes tasak oraindik "apalak" direla. Ondorioz, ez du baztertu berriz igoko dituztenik, "inflazio arriskua" dagoelako.
Gaurko igoerarekin, tasa nagusiak mailarik altuena hartu du, 2009ko martxoaz geroztik. Moneta politika orain ere "moldakorra" dela esan du Trichetek, eta horregatik babesten dituela jarduera ekonomikoa eta enplegu sorrera.
EBZko presidenteak azpimarratu du inflazioa kontrolatzeko asmoz hartu dutela erabakia, eta "aho-batez" hartu dutela zehaztu du. Erabakiak, ordea, zaildu egin dezake Europa hegoaldeko herrialdeen ekonomien suspertzea.
Hipotekak, garestiago
Erabaki horrek eragin zuzena izango du herritarrengan, garestitu egingo baititu maileguak. Baita hipoteka maileguak ere. EBZk diruaren prezioa igotzen badu, igo egingo baitira finantza erakundeek herritarrei uzten dizkieten maileguen interesak. Euriborra —hipoteka gehienetarako erabiltzen den erreferentzia— igotzen ari da azken hilabeteetan, eta interes tasak igota, joera horri eutsiko dio.
