EAEko Aldizkari Ofizialak irailaren 25eko hauteskundeetarako behin betiko zerrendak argitaratu ditu. Denera 37 zerrenda ageri dira aldizkarian; 12 hautagaitza Araban, 14 Bizkaian, eta 11 Gipuzkoan. Bederatzi alderdi edo koaliziok hiru lurraldeetan zerrenda bana aurkeztu dute: EAJk, EH Bilduk, Elkarrekin Podemosek, PSE-EEk, PPk, Ciudadanosek, ATTAKAA alderdi animalistak, Irabazik eta Recortes Cerok.
Aulki Zuriak eta Ongi Etorri hautagaitzek zerrendak aurkeztu dituzte Araban eta Bizkaian; Familia y Vida alderdiak, berriz, Gipuzkoan eta Bizkaian. Horiez gain, Vox alderdiak zerrenda aurkeztu du Araban; Alderdi Humanistak eta Euskal Komunistek Bizkaian; eta Libertad Navarrak Gipuzkoan.
Behin-behineko zerrendetatik bi aldaketa egin dituzte hauteskunde batzordeek: Gipuzkoakoak Arnaldo Otegi kendu du EH Bilduren zerrendako lehen postutik, eta Maddalen Iriarte jarri du leku horretan; Bizkaikoak, berriz, ez du ontzat eman Alderdi Libertarioaren zerrenda.
Hau ez da militantziak erabakitako hautagai zerrenda! Bat falta! @ArnaldoOtegi ! #eginherripic.twitter.com/ko0WWKcPGb
— Mikel Arreseigor (@MikelArreseigor) 2016(e)ko abuztuak 30
Hauteskunde batzordeek argitaratutako zerrendei helegiteak jartzeko aukera dago orain, administrazioarekiko auzitegietan. Halaxe egiteko asmoa du EH Bilduk.
