Hondakinak biltzeko atez ateko sistema jartzea edo organikoa jasotzeko bosgarren edukiontzi bat jartzea. Bi aukera horien artean bozkatu dute Bergaran botoa ematera joan diren herritarrek, %41,7k. Prozesua, baina, hasieratik izan da gorabeheratsua, EH BIlduk salatu duenez, eta ez du babestu, besteak beste, galdeketarako erabili beharreko errolda bera ez dakielako nondik atera den. Hori dela-eta Bergara Zero Zabor taldekoak saiatu dira asteburuan, bozketak iraun bitartean, begirale gisa egoten, baina ez diete utzi. Herritarrek galarazi dute sarrera.
Galdeketan gertatutakoa jaso dute, berriz, bideo batean. Sare sozialen bidez zabaldu duten bideoan erakutsi dituzte irregulartasunak: Bergaran erroldatuta egon gabe botoa eman ahal izan dute, nortasun agiririk erakutsi gabe ere bai, eta pertsona batek behin baino gehiagotan eman ahal izan du botoa.
Irregulartasunak erakusten dituen bideoa: [YouTube]http://youtu.be/3Oc4d6Chjhw[/YouTube]
Galdeketa "arrakastatsua"
Bergara Garbia plataformako kideek galdeketaren emaitzak nabarmendu dituzte, bai eta herritarren portaera ere: "Emaitza oso onak izan dira, kontuan hartuta EH BIlduk bozkatzera ez joateko deiak nahastu egin duela giroa", Jose Antonio Aperribai plataformako eledunaren arabera. "Argi dago bergararrak atez atekoaren kontra daudela", eta udalari eskatu dio emaitzak kontuan har ditzala.
