Joseba Asiron Iruñeko alkatea German Rodriguezen omenaldian izango da uztailaren 8an; hala, Iruñeko alkate batek omenaldi horretan parte hartzen duen lehen aldia izango da.
Sanferminak ziren, festetako hirugarren eguna, eta, zezen plazan izandako liskar handien ondoren, tiroz hil zuten, Orreaga etorbidean. Liga Iraultzaile Komunistako (LKI) kidea zen, eta 23 urte zituen hil zutenean.
"Bada garaia Iruñeko Udalak eta alkateak ekitaldi horretan presentzia izateko", adierazi du Asironek. Halaber, salatu du "akusaziorik eta zigorturik gabeko krimena" dela Rodriguezena. Gogorarazi du kanpainan esan zuela memoriaren eta erreparazioaren beharra, eta horri jarraituz parte hartuko du uztailaren 8ko ekitaldian.
