Negoziatzeari uko eginda edo aurretik udalari jakinarazi gabe etxe kaleratzeak gauzatzen dituzten bankuekiko harremana alda lezake Iruñeko Udalak. Hipoteka ordaintzeko zailtasunak dituzten herritarren egoeraz hitz egiteko, bilera egin dute Iruñeko Udalak eta hainbat bankuko ordezkariek, eta hor egin die oharra udalak.
La Caixa, Ibercaja, Bankia, Rural, Laboral Kutxa, Kutxabank, BBVA, Sabadell, Popular, Santander eta Caja Españako ordezkariak izan dira bileran; udalaren ordezkari gisa, berriz, Joseba Asiron alkateak, Joxe Abaurrea Etxebizitza zinegotziak eta Edurne Egino Gizarte Ekintzako zinegotziak hartu dute parte.
Etxe kaleratzeak saihesteko protokolo bat sortzea izan da bileraren helburua, besteak beste udalaren bitartekari lanak indartuz. Gainera, udalak gogorarazi du 300 bat lagun daudela premiazko irtenbide baten beharrean, Nafarroako hiriburuan badirela hutsik dauden etxebizitzak.
