Beñat Lizeaga, Aitziber Plazaola, Bergoi Madernaz, Endika Perez, Jazint Ramirez, Xalbador Ramirez eta Aiala Zaldibar gazte independentista presoek gose grebari ekin diote, AAM Amnistiaren Aldeko Mugimenduak jakinarazi duenez. Seysseseko espetxean dauzkate, eta herenegun hasi ziren barauan.
Hilaren 23ra arte egongo dira protesta hori egiten, bi helbururekin, AAMk dioenez: "Alde batetik, euroaginduen aurka egitea da helburua, eta, bestetik, Irati Tobar kideari elkartasuna adieraztea". Tobar aske dago, eta hura ere barauan da aste honetatik.
Tobarrek eta beste zazpiek duela bi aste Izpuran itxialdia egin zuten, Espainiaratzeko arriskuaren aurka. Eragileei eta herritarrei babesa eskatu zieten. Hainbat hautetsik euren etxeetan aterpetzeko hautua plazaratu eta hala egin zuten. Besteak beste, PSko hautetsi batek Tobar hartu zuen etxean gau batean. AAMk txalotu egin du Ipar Euskal Herrian euroaginduen aurka hasi den dinamika.
