Urtarrilean Donostiako Ospitalean izandako gorabehera baten ondoren aldatu du protokoloa Osasun Sailak. Erietxetik jaioberri bat eramaten saiatu zen emakume bat; haurra besoetan zeramala atzeman zuten ospitalean bertan.
Protokoloko neurri nagusia izango da umeak gurasoen alboan edukitzea. "Zeregin guztiak (zainketak, azterketak, probak…) ohe ondoan egingo ditugu, haurra gurasoengandik ez bereizteko", adierazi du Osakidetzako Arreta Sanitarioko zuzendari Antonio Arraizak. Gerta daiteke, ordea, proba batzuk egiteko umea gelatik atera behar izatea. Kasu horretan, jaioberriaren gurasoei eskatuko diete medikuekin batera joan daitezela proba egin behar den tokira.
Protokoloan jaso dituzte ama haurdun geratzen denetik ospitaleko senda-agiria jasotzen duenera arteko pauso guztiak. Identifikatzeko ereduak eta horrelakoak berrikusi egingo dituzte.
