Ipar Euskal Herrian Janssen txertoa erabiltzen segituko dute. Frantziako Gobernuko Gabriel Attal bozeramaileak goizean baieztatu du Johnson & Johnson enpresaren Janssen txertoa jartzen segituko dutela Frantziako Estatuan, aurreikusi bezala. Halere, 55 urtetik gorako herritarrei bakarrik jarriko diete, AstraZeneca txertoa bezala. Iragan astelehenean 200.000 dosi eskuratu zituen Frantziak, eta dagoeneko hasiak dira txertaketa guneetara garraiatzen.
Bestalde, Attalek segurtatu du «konfiantza osoa» duela AstraZeneca txertoan; 55 urtetik gorako herritarrei jartzen jarraituko dute.
Osakidetza, berriz, ez da hasiko Janssen txertoa jartzen. AEBetan txertoa erabiltzeari utziko diote, odolbilduekin zerikusia ote duen ikertzeko. Ondorioz, Europako Batasunak bertan behera utzi du banaketa, oraingoz.
Janssen txertoaren berezitasuna da dosi bakarra nahikoa dela immunitatea garatzeko.
Bidaiak, are murritzago
Attalek goizean iragarri du datorren astelehenetik goiti Frantziako Gobernuak neurri murritzaileagoak ezarriko dituela bidaiatzeko. Atzo, Brasil eta Frantzia arteko hegaldiak bertan behera uztea erabaki zuen Jean Castex Frantziako lehen ministroak. Aldaera berrien beldurrez, beste herrialde batzuetarako bidaiak murriztea espero da, beraz, astelehenetik goiti.
