Erabakiari buruzko balorazio ofizialik ez du egin Eusko Jaurlaritzak, nahiz Nafarroan izango diren aldaketek eragingo dioten. Iturri ofizialetatik BERRIAri azaldu diote kontuan daukatela erakundeen egoera ekonomikoa ez dela ona. "Ulertzen dugu ekonomikoki tentuz jardutea".
Hortik aurrera, azalpen gutxi dituzte hemendik aurrerakoaz. Berez, Gasteizko eta Iruñeko gobernuen asmoa zen Gipuzkoako eta Nafarroako ibilbideak Ezkio-Itsasotik lotzea. Horrekin zer gertatuko den ez dute argitu. Adierazi dute, ordea, bi gobernuek gutun bat igorri diotela oraindik orain Sustapen Ministerioari, lotura aztertu behar duen batzordea martxan jar dezan berriro —"geratuta dago bi urteotan", diote Jaurlaritzan—.
Nafarroako Gobernuaren erabakiak AHT proiektua ez du ezbaian jarri, Gasteizko gobernuaren ustez. "Pozik gaude egoera honetan ere Europaz gaindiko sareen aldeko konpromisoa daukalako Nafarroako Gobernuak".
