Iñaki Arriola Eusko Jaurlaritzako Garraio sailburuak "premiazko" bilera bat deitzeko eskatu dio Espainiako Gobernuari, honek 2013ko aurrekontuetan EAEko AHT abiadura handiko trenaren lanetako diru poltsa %40 murriztu duela jakitean. Arriolaren esanetan, aurrekontu horiekin AHTaren lanak "ez dira amaituko 2016rako", iragarrita zuten bezala.
Gobernuak larunbatean aurkeztu zituen 2013. urterako aurrekontuak, eta murrizketa handiak egin ditu AHTaren lanetarako. Euskal Y-a egiteko 314 milioi euro eman ditu aurten Madrilek, eta datorren urtean 190 milioi emango ditu; %40ko murrizketa da hori. Trena 2016. urterako amaituta egotea espero zuen Jaurlaritzak baina, diru sorta horrekin, helburu hori zapuztea egotzi dio Arriola Garraio sailburuak Madrili. 2017rako amaitzea espero du orain Jaurlaritzak.
Nafarroan ere diru gutxiago emango du Madrilek azpiegituretarako. 68,31% egingo du behera datorren urterako azpiegituretarako aurrekontuak: 25 milioi emango ditu. Horietatik bost izango dira AHTa egiteko, eta, beraz, moteldu egingo dira lanak.
Eusko Jaurlaritzak premiazko bilera eskatu dio Ana Pastor Espainiako Sustapen ministroari, aurrekontu murrizketaren inguruko azalpenak eman ditzan. Egoera kezkagarritzat jo zuen atzo Ernesto Gascok, Eusko Jaurlaritzako Garraio sailburuordeak. Gainera, Gascoren esanetan, aurrekontuaren beherakada horrenbestekoa izateak kontra egiten dio Pastorrek berak AHTa lehentasunezkotzat jotzeari.
