Eusko Jaurlaritzatik Efe agentziari azaldu diote "zaila" ikusten dutela Espainiako Gobernuak hezkuntza eta osasun arloetarako aurreikusitako murrizketak EAEn aplikatzea. Jaurlaritzaren arabera, "normalena" neurri horiek Araba, Bizkai eta Gipuzkoan eraginik ez izatea da.
Murrizketa horiek Araba, Bizkai eta Gipuzkoan aplikatu ahal izateko, oinarrizko legedia aldatu beharko litzatekeela diote, eta beraz, "korapilatsua" ikusten dute neurriok aurrera egitea.
Rafael Bengoa Jaurlaritzako osasun sailburuak ETBn emandako elkarrizketa batean berretsi du osasun arloko murrizketak "ez direla aplikatuko".
Anton Danborenea Eusko Legebiltzarreko PPko bozeramaileak gaur Radio Euskadin emandako elkarrizketan esan du murrizketa horiek "printzipioz autonomia erkidego guztiengan" izan dezaketela eragina, baina zein erkidegotan aplikatuko den ikusi beharko dela gaineratu du.
"Argi dagoena da ez dutela herritarren oinarrizko zerbitzuetan eraginik izango", esan du Danboreneak. Horrekin batera, esan du hezkuntza eta osasun zerbitzuak "guztientzat doakoak" izango direla.
