Eskola Txikien 25. Festa izan zuten atzo Larraulen (Gipuzkoa). 10:00etan ekin zioten festari, txupinazoarekin, eta iluntzera arte eskulanak egiteko aukera, Pirritx eta Porrotxen emanaldia, bazkaria, animalien gunea, musika eta erakusketa bat izan ziren, besteak beste. Festaren antolatzaileak pozik agertu dira egindako ahaleginaren ondotik jaiak harrera ona izan duelako.
Eguerdian ekitaldi ofiziala egin zuten, eta han izan ziren Gipuzkoako hainbat ordezkari; tartean, Martin Garitano ahaldun nagusia. Aldundiak "landa garapen orekatua" bultzatzea helburu duela adierazi zuen, eta ahalegin horretan, eskola txikiak "babestu eta indartu" behar dira, haren ustez.
Eskola txikien dokumentala
Eskola Txikien Festaren 25. urteurrena ospatzeko, eskola txikiei buruzko Eskola bizia, herri bizia dokumentala ere egin dute aurten, eta Tolosan aurkeztu ondoren, Larraulen eskaini zuten atzo.
Gipuzkoako eskola txikien mugimenduaren lekukotasuna jasotzen du dokumentalak. Eskola Txikietako Gurasoen Koordinakundeak egin du, Iñaki Alcalderen eskutik. Gurasoek, irakasleek, ikasleek eta udal ordezkariek euren esperientzia kontatzen dute. Euskara hutsean egina dago, gaztelerazko eta ingelesezko azpidatziekin.
Datorren urtean Olaberrian antolatuko dute Eskola Txikien Festa.
