Bartzelonako Euskal Etxeak urtero antolatzen duen euskal zinema jaialdiak bihar Jesus Egiguren PSE-EEko presidentea izango du gonbidatu.
Lehenik, Memorias de un conspirador dokumentala eskainiko dute —Konspiratzaile baten memoriak—, Angel Amigoren lana. Egiguren da bertako protagonista; ETArekin izandako azken negoziaketen kontakizuna egiten du. Ondoren, solasaldi bat izango da biekin. Joan den irailean aurkeztu zuten Memorias de un conspirador.
Ernest Maragall Kataluniako Generalitateko kontseilari ohi eta PSCko zuzendaritzakide ohia ere izango da ekitaldian, baina hasieran baino ez, agenda arazoengatik, antolatzaileek esan dutenez. Gaur egun Nova Esquerra Catalana alderdiko presidentea da.
Ekitaldia 20:00etan hasiko da, Euskal Etxearen egoitzan —Arc de Sant Vicenç—.
Hilaren 1ean ekin zioten euskal zinema jaialdiari. Besteak beste, hilaren 15ean Gazta zati bat eskainiko dute eta 22an Barrura begiratzeko leihoak. 28an amaituko da (egitaraua).
