Garcia Ripalda zenaren adiskide eta senideek hura oroitu, eta "Poliziak etengabe eragiten zuen errepresioaren biktimek egia, justizia eta ordaina eskuratzeko eskubidea" aldarrikatu dute 13:00ean. Kaleko jantzitako polizia batek tiroz hil zuen leku berean omenduko dute; Donostiako Mirakruz eta Aita Larroka kaleen izkinan.
[Youtube]https://youtu.be/aFbbUT31xnY[/Youtube]
Euskadiko Mugimendu Komunistako kidea zen Garcia Ripalda, eta 23 urte zituen Poliziak tiroz hil zuenean. Espainiak heriotza zigorra ezarria zien Jose Antonio Garmendia, Angel Otaegi eta FRAPeko Jose Humberto Baena, Jose Luis Sanchez Bravo eta Ramon Garcia Sanzi, eta horren aurkako protesta egiten ari ziren Donostian, polizia batek sabelean tiro egin zionean.
Inor ez zuten epaitu Garcia Ripaldaren hilketagatik. Auzia "terrorismoarekin" lotu, eta artxibatu egin zuten. Donostiako Udalak 2011n eman zien hiriaren urrezko domina haren senideei.
Azken heriotza zigorren aurka protestan
Irailaren 27an fusilatu zituzten Otaegi eta FRAPeko hirurak, Jon Paredes Manot Txiki-rekin batera. Abuztuaren 31n, Garcia Ripalda hil zutenean, Garmendia, Otaegi, Baena, Sanchez Bravo eta Garcia Sanzi ezarria zieten heriotza zigorra. Garmendia, ordea, ez zuten fusilatu, haren osasun egoera zela-eta; bizi arteko espetxe zigorra ezarri zioten horren ordez. Txiki, ordea, ez zegoen Otaegi eta FRAPekoen auzi berean; irailaren 19an egin zuten haren aurkako gerra kontseilua, eta irailaren 26an ezarri zioten heriotza zigorra. Biharamunean fusilatu zituzten.
