Jokin Aranalde Euskal Iheslari Politikoen Kolektiboko mintzaidearen auzia artxibatu egin dute Espainiako auzitegiek, Tolosaldeko Ataria-k jakinarazi duenez. "Benetan pozik egotekoa da; albiste garrantzitsua da niretzako pertsonalki. Gauza askotatik libratzen zaitu eta etorkizuna beste perspektiba batekin begiratzeko aukera ematen dizu", azaldu dio Aranaldek Tolosaldeko hedabideari.
Epailearen aurrean astero aurkeztu behar zuen bere burua Aranaldek, baina bere kontrako neurriak bertan behera utzita —tartean, Espainiako Estatutik irteteko debekua—, Frantziako Poitiers-Vivonne espetxean dagoen Maite Aranalde alaba bisitatzeko aukera izango du aurrerantzean.
Gaztelukoa (Gipuzkoa) da Aranalde, baina Ibarran bizi izan da luzaroan. Espainiako Estatuan hiru aldiz atxilotu dute, eta hiruretan torturak salatu ditu. Iazko uztailean atxilotu aurretik, 11 urtez bizi izan zen Iparraldean, eta EIPK-ko mintzaideetako bat da.
Iazko atxiloketaren aurretik, Frantziako Poliziak 2013ko ekainaren 24an atzeman zuen. Heletan izan zen (Lapurdi), Miarritzen egindako Herria Dugu Arnas ekitalditik astebetera. Libre utzi zuten, Paueko Dei Auzitegiko Instrukzio Ganberak euroagindu eskaera aztertu artean. Iazko irailean, Aranalderen aurkako euroagindua onartu zuen Paueko Auzitegiak: erabakiari helegitea jarri zioten abokatuek, baina Parisko Kasazio Gorteak urriaren 30ean helegitea atzera bota eta Espainiaratzea onartu zuen.
Hurrengo egunean, ordea, Aranaldek eskutitz batean jakinarazi zuen "jarrera intsumisoa" hartu zuela, EIPK-ko bozeramailetako bat izanik bere konpromisoa zelako "azken iheslari eta deportatuak Euskal Herrira ekartzea, guztiok herri libre batean bizitzeko". Zenbait hedabideri eta BERRIAri helarazitako gutun ireki batean, esan zuen Espainiaratzeko agindua auzi politiko baten ondorio dela, eta jasandako torturak salatu zituen. "Azken 50 urteetan torturatutako 7.000 lagun horietako bat naiz". Eragile askoren babesa izan zuen.
