Jokinen senideei babesa eman diote Hondarribin

Jokinen eta bere senideen lagun talde batek antolatu du manifestazioa. Familiaren lagunen izenean Jose Manuel Susperregi EHUko irakaslea, manifestazioa antolatzeko arrazoiez mintzatu zen: «Jokinen heriotzatik gaur arte isiltasuna izan da nagusi. Denbora dezente igaro da, eta gizarte eragileek ez dute ekimenik antolatu familiari elkartasuna adierazi eta arazoaren aurka protesta egiteko. Halakorik izan ez denez, manifestazio hau antolatzea erabaki dugu, familiarekin harmonian eta bere onespenarekin». Bere esanetan, «isiltasunak» ez du ikaskideen artean gertatzen diren erasoen arazoa konponduko eta ekimen honek «konponbidearen hasiera» ekar dezake. Manifestazioaren helburu nagusia Jokinen sendiari elkartasuna adieraztea bada ere, jazarpena jasaten duten beste gazteei ere babesa eman nahi diete antolatzaileek, «beren bakardadeetatik ateratzen laguntzeko».