Apirilaren 18an desagertu zen Jon Anza. 2009an. Bost urte geroago, deus gutxi argitu da, eta, aldiz, zalantzak eta susmoak areagotu dira. 2010eko apirilaren 11n jakin zen ofizialki Anzaren gorpua Okzitaniako Tolosa hiriko Purpan erietxean zegoela.
Hura desagertu zenetik bost urte igaro direla-eta, ekitaldi batera deitu dute Urruñako plazan (Lapurdi). 20:00etatik aurrera egingo dute ekitaldia, Egia nahi dugu lelopean.
Hilabeteko azken ostiralero, Hendaian bildu ohi dira euskal presoen eta iheslarien alde. Anzaren aldeko ekitaldia dela-eta, Urruñan egingo dute Hendaian egin ohi duten elkarretaratzea, 19:00etan, biribilgunean.
