Jon Iñarritu Aralarreko kide eta Amaiurreko diputatuak jakinarazi du EAEko PPk Aralarrekin azaroan egindako bileran iragarri ziela espetxe politikan aldaketak egingo dituela Espainiako Gobernuak, baina honek "denbora pixka bat" beharko duela.
"Esan ziguten sektore batzuen erresistentzia izango dutela", adierazi du Iñarrituk gaur Infozazpi irrati katean. Honen ustez, sektore horiek Espainiako eskuin muturra eta hedabide batzuk dira.
PPk Espainiako hauteskundeak irabazi eta egun batzuetara izan zen aipatutako bilera. Antonio Basagoiti EAEko PPko presidentea eta Patxi Zabaleta Aralarreko koordinatzailea izan ziren buruak, eta han zen Iñarritu bera ere.
