Jose Elorrieta: "LAB da gure pisuzko aliatu posible bakarra"

"Guretzako ekintza batasuna elementu estrategikoa da, bakarrik ahulago baikara. Gure aliatu pisuzkoa Euskal Herriko langileen artean presentzia nabarmena duelako LAB da; LAB da pisuzko aliatu posible bakarra. Beste sindikatu batzuekin, ESKrekin eta EILASekin, oso harreman onak ditugu eta haiekin ere lan egin nahi dugu, baina LAB da sindikatu garrantzitsuena", adierazi du Elorrietak.

Hala ere, berriro ekintza batasunera iristea zaila izango dela aitortu du. "Egungo egoeran arazo handia daukagu [LABekin] negoziazio kolektiboa kudeatzeko. Epe laburrean konpontzeko aukeraren iguruan ez naiz baikorra. Badago eremu bat iraunkorki landu behar dena, baina, era berean, badago errealitate objetibo bat itxaropen gutxi ematen duena hori epe laburrean konponduko dela konpontzeko".

Lizarra-Garazirekin zerikusirik ez duen prozesu politikoa

ELA eta LABen arteko "pitzadurak" prozesu politikoari nola eragin diezaiokeen galdetu diotenean, Elorrietak erantzun du gaur egun abian dagoenak ez duela zerikusirik 1995-1996ean abiatu eta Lizarra-Garaziko hitzarmena bideratu zuenarekin. "Egungo diseinua Lizarra-Garazin amaitu zenaren desberdina da. Ez hobea, ez okrragoa, desberdina. Dena den, modu desberdin bat da puntu berera iristeko: inflexio puntu bat zeinak atzera bueltarik gabeko ziklo politiko berri bat irekiko duena, eta guztiz zibila izango dena. Garrantzitsua hori da, puntu horretara iristea. ELAk sindikatu gisa babestu eta bultzatuko du ziklo hori behin betiko zabaltzea, gatazka horretan aktore nagusi direnek ematen diguten rola edozein dela ere", azpimarratu du.