Jose Luis Alvarez Santacristina presoari espetxealdi arindua ezarri dio Auzitegi Nazionalak

Auzitegi Nazionaleko espetxe zaintzarako epaileak ebatzi du Jose Luis Alvarez Santacristina Txelis-i espetxealdi arindua ezartzea, eta, modu horretan, egunero lan prestakuntza arloko ikastaroetara joateko espetxetik atera ahalko da. Dena den, asteburuko baimenik ez dio eman epaileak. Jose Luis Castro epailearen arabera, Espetxe Erregimeneko legeak eskatzen dituen baldintzak betetzen ditu Txelisek: «Espetxera sartu zen garaiarekin alderatuta, pertsona desberdina da, indarkeriaren aurka gaitzespen erabatekoa erakutsi duelako eta horren inguruko sinesmen pertsonal eta moral sendoak dituelako». Gainera, zigorraren erdia bete duela eta biktimei barkamena eskatzeaz gain «bere ekintzetatik eratorritako erantzukizun zibila ordaintzeko prest» dela arrazoitu du.