Joseba Irazokik eta Lisabok BERRIAren aldeko kontzertu bat emango dute larunbatean Hondarribian, Psylocibenean (22:00). Azken urtean aritu den formatuarekin ariko da zuzenean Irazoki, orkestrako musikari gisa. "Egun polita izango da, bai Lisaborekin jotzeagatik, bai kontzertuaren arrazoiagatik", esan du. Irazokik 'Oso banda' lau kantuko diskoan islatu ditu azken urteko kontzertuak.
BERRIA Taldea Zure ziztada behar dugu leloa duen egitasmoa ari da burutzen duela urtebetetik. BERRIAlaguna komunitatea indartzeko eta diru bilketa egiteko ahal den herritar eta eragile gehienengana iristeko ahaleginean da euskarazko hedabide taldea.
Arazo ekonomikoek bultzatuta, BERRIA iazko urte amaieran hasi zen diru ekarriak biltzen, lanari eutsi eta indartzeko. Hedabide taldeak dio egoera zailean dagoela. "Paradoxikoa bada ere, inoiz baino irakurle gehiago dituen garaian ari dira behera egiten BERRIAko diru sarrerak". Nagusiki bi dira horren arrazoiak: hedabideetan izaten ari den eredu aldaketa —paperaren beherakada, sarearen gorakada baina diru sarrera txikiarekin— eta krisi ekonomikoa —erosle, diru laguntza eta publizitate gutxiago—.
Egitasmoak BERRIAlagunak bildu nahi ditu, milaka lagunen elkarlana bideratu nahi du proiektu honen inguruan. Jadanik ia 4.100 BERRIAlagun daude.
