Josefina Aguirre zentroa arriskuan jarri izana salatu dute Sakanako udalek

Nafarroako Gobernuaren murrizketek Altsasuko Josefina Aguirre zentro psikogeriatrikoa arriskuan jarri dutelakoan, salaketa egin dute Sakanako hautetsiek eta mankomunitateak. Gogorarazi dute zentroaren alde adierazpen bat egina baduela parlamentuak; hartan, gobernuari eskatu zion zentroaren arazo ekonomikoak konpontzeko eta 21 oheen hitzarmenari eusteko. Ordea, gobernuak jakinarazi berri du sei ohe soilik finantzatuko dituela. Udalek bereizkeria ikusi dute. Haien esanetan, Tuteran dagoen gisa bereko zentro pribatu bati tratu hobea eman dio gobernuak. San Juan de Dios ospitalearena da egoitza; Nafarroako Kontu Ganberak asteon adierazi du Osasunbideak justifikaziorik gabe pagatu ziola klinika horri.