Etxerat-ek adierazi duenez, lehenagotik ere Murtziako kartzelan egon eta gaixotasun larriak izan dituzten euskal presoek salatu dute presondegi horretako egoera eskasa eta artarik eza. Esaterako, minbizia aurkitu zioten preso bati mediku azterketa egin eta sei hilabetera jakinarazi zioten gaixotasunaren berri, eta kimioterapia saioak eskuburdinak lotuta eman zizkioten. Horiek jakinda, "kezka" azaldu dute Arizkurenen senide eta gertukoek.
Beste aldetik, libre gelditu da Maialen Zuazo Bilboko Santutxu auzoko gaztea, zazpi urteko zigorra bete ostean. Hiru urtez espetxean egon ondoren aske utzi zuten diru bermea ordainduta, baina 2014an berriro atxilotu eta espetxeratu zuten gelditzen zitzaion zigor zatia betetzeko.
