Beste Bi plataformak omenaldia egin dio Bilbon kalean hildako azken etxegabekoari, bigarrena 2015ean. Kalean bizi direnen egoera salatu du plataformak, eta gizarteari dei egin dio “etxerik gabe bizi diren pertsona horiek guztiak ikusteko gai” izan dadin.
26 urteko gazte poloniarra zen hildakoa. 2011tik zegoen Bilbon, tarteka bazen ere, bizimodua ateratzeko asmotan sarri joaten zelako beste leku batzuetara. Duela gutxi, esaterako, Frantzian egon zen, mahatsak biltzen eta eraikuntzan lanean. Bilbora itzuli ondoren, behin baino gehiagotan adierazi zien gizarte zerbitzuetako langileei seguru asko laster bueltatuko zela Frantziara, Bilbon ez baitzuen aurrera egiteko modurik topatzen.
Elkarretaratzean minutu bateko isilaldia egin dute. Ondoren, plataformako kideek agiria irakurri dute, eta kalean bizi den lagun batek hitzaldi labur bat egin du gazte poloniarra gogoan. Han bildutakoen txaloekin amaitu da ekitaldia.
