Kalitatezko hezkuntza publikoa nahi du Amaiurrek

Kalitatezko hezkuntza sistema publikoaren alde egin du Amaiurrek Nafarroan, «UPN-PPk PSNren laguntzarekin ezarri nahi duten eredu erabat atzerakoiaren aurka». Hala esan zuen atzo Sabino Cuadra zerrendaburuak, Nafarroako Gobernuko Hezkuntza Sailaren egoitzaren aurrean egindako agerraldian. Herritarren oinarrizko eskubideak ez errespetatzea, curriculum foral-espainiarra inposatzea eta irakaskuntza pribatua sustatzea egotzi die hiru alderdi horiei. Euskararen ofizialtasuna eragozten dutenez hizkuntza horretan ikastea galarazten dutela salatu du, besteak beste. Gainera «inoizko grebarik handiena» ikusi arren, jaramonik ez egitea egotzi die alderdi horiei.