Juan Kalparsoro EAEko Auzitegi Nagusiko fiskalburuak adierazi duenez, oraindik ez dakite nor izan zen "Iñigo Cabacasen heriotza eragin zuen pilotakada jaurti zuen ertzaina", baina uste du "Ertzaintzaren hierarkian" ardurak egon daitezkeela, baita "pilota botatzeko erabakia hartu zen unean zeuden agintariengan" ere.
Efe berri agentziari emandako elkarrizketan esan du "argi" dagoela Cabacasen heriotza "bidegabea" izan zela, eta ondorioak izan behar dituela arlo ekonomikoan nahiz politikoan. Bost dira oraingoz Cabacas gaztearen heriotzan ustez parte hartu zuten ertzainak.
