Juan Kalparsoro Euskal Autonomia Erkidegoko fiskal nagusiaren arabera, froga perizialek ez dute azaleratu zein eskopetatik egin zioten tiro Iñigo Cabacas Athleticeko jarraitzaileari, eta, beraz, "oso zaila" izango da ertzain zehatz bat salatzea Cabacas hil izanaz.
Lau ertzain inputatu zituen epaileak Cabacasen auziaren harira, eta bihar eta etzi deklaratuko dute. Efe agentziari eginiko adierazpenetan, Kalparsorok azaldu du "pertsonalki" auziaren jarraipena egin duela, gertatutakoaren "larritasuna" eta hura argitzeko "aldarri soziala" direla eta.
Gogoan izan du bi urte beteko direla apirilean Ertzaintzaren pilotakada batek jota hil zela Cabacas, eta ikerketari "bultzada" eman behar zaiola uste du. "Ikertzen jarraitu beharra dago, deliturik egin ote zen zehazteko", gaineratu du.
