Katalunian errepublikari buruzko erreferenduma egin zutenetik urtea beteko da urriaren 1ean. Katalanei "elkartasun eta konplizitate osoa" agertzeko, elkarretaratzeak egingo dituzte egun horretan Euskal Herrian. Udaletxe aurrean elkartuko dira Iruñean eta Donostian, 19:30ean; Bilbon ordu bererako egin dute deia Arriaga plazan; eta Gasteizen, 20:00etan batuko dira, Andra Mari Zuriaren plazan. Presoen askatasuna exijitzeko eta Espainiako estatuaren errepresioa salatzeko ere izango da elkarretaratzea.
Errepublika Katalana eraikitzeko "agindu garbia" eman zuten Kataluniako herritarrek iaz, Independentista Sareak oharrean esan duenez, "Estatu espainiarraren errepresio bortitzari aurre egin eta egundoko demokrazia ariketaren bitartez".
Gogor salatu dute Espainiako estatuak Kataluniako prozesuaren aurrean hartutako jarrera: "Gogor agertu da ultranazionalismo espainiarra eta, berriro ere, bere aurpegirik bortitzena erakutsi du bere sustraiak frankismoan dituen 78ko Erregimenak".
